“Чехияга ишлаш мақсадида келган, бироқ айрим ҳуқуқий муаммо ва молиявий сабабларга кўра, мураккаб вазиятга тушиб қолган юртдошимиз дипломатик ваколатхона кўмагида ватанга қайтарилди”, – деб хабар қилмоқда “Дунё” агентлиги.

Ўзбекистонлик фуқаро Ш.Н. Чехияга меҳнат қилиш мақсадида боргач, хорижга чиқиш паспортини ўғирлатиб қўяди. Натижада, ишлаш учун керакли ҳужжатларни ўз вақтида расмийлаштирмагани сабабли, ноқонуний мақомга ўтиб қолган. У бунга эътибор қилмасдан, шу тариқа яшаб, ишлаб келган. Ўзбекистонга қайтиш пайти келганда эса янги ҳужжатни қаердан олиш мумкинлиги ҳамда ватанга қандай тартибда қайтишни билмаган.

Паспортсиз қолгани, Чехия Республикасида қонуний яшаш ҳамда ишлаш учун ҳужжат расмийлаштиришнинг мураккаблиги сабабли Ш.Н. оғир ижтимоий аҳволга тушиб қолган. У мушкул вазиятини ҳал этиш мақсадида Ўзбекистоннинг Чехиядаги элчихонаси консуллик бўлимига ёрдам сўраб мурожаат қилган.

Ўзбекистон дипломатик миссияси ушбу ҳолат юзасидан дарҳол чоралар кўриб, фуқарога амалий ва ҳуқуқий ёрдам кўрсатиш мақсадида Прага шаҳридаги Халқаро миграция ташкилоти (ИОМ) билан музокара олиб боради. Ш.Н.га ватанга қайтиш гувоҳномаси расмийлаштирилиб, 3 март куни унинг Ўзбекистонга қайтишига кўмаклашилган.

• Chexiya
• Elchixona
• Ўзбекистонлик
• fuqaro