Январь-сентябрь ойларида Ўзбекистон олтин экспортини 9,9 млрд долларгача оширди. Сентябрь ойининг ўзида Ўзбекистон 1,5 млрд долларлик олтин экспорт қилди.

Ўзбекистон Марказий банки август ойида 2 тонна олтин харид қилган. Бироқ, йил бошидан буён мамлакат олтин-валюта захираларида олтиннинг физик ҳажми 17 тоннага камайиб, 366 тоннани ташкил этди. Шу нуқтаи назардан, Ўзбекистон олтин сотишда дунё бўйича етакчилик мақомини сақлаб қолмоқда.

Аввалроқ экспорт ҳажми февраль ойида 1,73 млрд доллар, март ойида 1,84 млрд доллар, апрель ойида 1,91 млрд доллар, май ойида 1,01 млрд доллар, июль ойида 1,09 млрд доллар, август ойида 836 млн доллар даражасида қайд этилганди. Мамлакат экспорти таркибида олтиннинг улуши 37,1 фоизга етди (ўтган йилнинг шу даврида — 28,9 фоиз).

Миллий статистика қўмитаси жисмоний ҳажмда қанча олтин экспорт қилинганини очиқламаган.

Ўзбекистон президенти Шавкат Мирзиёев аввалроқ геология-қидирув ишларида янги ёндашувларни жорий этиш ҳисобига олтин ва уран қазиб олиш ҳажми сезиларли даражада ошганини маълум қилганди. Унинг сўзларига кўра, 2016 йилда олтин қазиб олиш ҳажми 86 тоннани ташкил этган бўлса, жорий йилда 118 тоннага етиши кутилмоқда.

• Экспорт
• Олтин
• статистика