Бугун, 15 май куни Тошкент ҳарбий округининг “Ангрен” дала ўқув майдонида Ўзбекистон ва Қозоғистон Қуролли Кучлари бўлинмаларининг ҳамкорлигидаги “Қалқон-2023” махсус тактик-ўқув машғулотлари тантанали очилиш маросими бўлиб ўтди. Бу ҳақда Мудофаа вазирлиги Ахборот ва оммавий коммуникациялар департаменти матбуот хизмати хабар берди.

“Бугунги кунда дунёнинг турли минтақаларида нотинчлик, кескинлик ва қуролли тўқнашувлар ўзаро мулоқотларда ҳал қилувчи куч сифатида намоён бўлаётгани ва уларни минтақамиз яқинида юз бераётгани ўзаро ҳарбий соҳадаги ҳамкорлигимизни янада кучайтиришга ундамоқда. Бошланаётган ҳамкорликдаги махсус тактик-ўқув машғулоти ҳам икки мамлакатнинг ҳарбий соҳадаги узоқ йиллик тарихий асосларга эга дўстона муносабатларининг яна бир тимсолидир”,– дейилади хабарда.

Тадбирда Тошкент ҳарбий округи қўшинлари қўмондони полковник Зокир Сайфудинов сўзга чиқиб, икки давлат ўртасида ўзаро ҳарбий соҳада бундай яқин ҳамкорликнинг ўрнатилиши Марказий Осиё минтақасидаги хавфсизлик ва барқарорликни таъминлашда муҳим аҳамият касб этиши алоҳида таъкидлаб ўтди.

Таъкидлаш керакки, мазкур ҳамкорликдаги ўқув машғулотлари ўзбек-қозоқ ҳарбий хизматчилари учун ўзаро тажриба алмашиш, билим ва кўникмаларни мустаҳкамлаш, энг муҳими, ўзаро ҳамжиҳатлик ва дўстлик алоқаларини мустаҳкамлашга хизмат қилади.

• Ҳамкорлик
• Мудофаа
• harbiy xizmat