Қозоғистон ва Ўзбекистон ўртасидаги савдо-иқтисодий ҳамкорликни кенгайтириш масалалари муҳокама қилинди.

Ўзбекистон Бош вазири ўринбосари Жамшид Хўжаев ҳамда Инвестициялар, саноат ва савдо вазири Лазиз Қудратов Қозоғистон Савдо ва интеграция вазири Арман Шаққалиев билан музокаралар ўтказди.

Икки мамлакат вакиллари ўзаро товар айирбошлаш ҳажмини ошириш воситаларини, шунингдек, саноат кооперацияси, сармоявий кооперация, транспорт соҳасида ўзаро ҳамкорлик ва бошқа масалаларни кўриб чиқдилар.

Хусусан, Қозоғистон товарларини Ўзбекистон ҳудуди орқали транзит қилиш ва Тошкент шаҳрида “QazTrade” АЖ ваколатхонасини очиш масалалари муҳокама қилинди.

Қозоғистон Савдо ва интеграция вазирлигининг хабар беришича, мамлакатлар товар айирбошлаш ҳажмини йилига 10 миллиард долларга етказиш йўлида ҳаракат қилмоқда. Ўтган йилнинг охирида Қозоғистон ва Ўзбекистон ўртасидаги товар айирбошлаш ҳажми 28,4 фоизга ўсиб, 4,9 миллиард долларга етди, жорий йилнинг 7 ойида ўзаро товар айирбошлаш ҳажми 2,5 миллиард долларни ташкил этди.

• Ҳамкорлик
• Қозоғистон