“2024 йил учун Ўзбекистон Республикасининг Давлат бюджети тўғрисида”ги қонун 25 декабрь куни президент томонидан имзолангани тўғрисида хабар берилганди. Ҳужжат билан биринчи даражали бюджет маблағларини тақсимловчиларига ажратиладиган маблағларнинг чекланган миқдорлари белгиланган.

Бунда бюджетдан ажратиладиган маблағларнинг умумий миқдори 255,44 триллион сўмни ташкил этади. Маблағлар жорий харажатлар (180,15 триллион сўм), ривожланиш дастурлари (33,2 триллион сўм), объектларни лойиҳалаштириш, қуриш (реконструкция қилиш) ва жиҳозлаш учун капитал қўйилмалар (10,82 триллион сўм) ва бошқа харажатларни ўз ичига олади.

Бундан ташқари, ҳужжатда соҳалар бўйича харажатларни қоплашга ажратиладиган маблағлар миқдори ҳам келтирилган. Масалан, келаси йилда ОТМларнинг магистратура босқичида ўқиётган барча хотин-қизларнинг контракт тўловларини қайтариш шартисиз қоплашга 200 миллиард сўм ажратилади.

Қайта тикланувчи энергия манбалари қурилмаларини харид қилиш харажатларининг бир қисмини компенсация қилишга тақдим этиладиган маблағлар 100 миллиард сўмни ташкил этади.

Шунингдек, ташаббусли бюджетлаштириш тадбирлари доирасида 1,5 мингдан ортиқ овоз тўплаган, лекин ғолиб деб топилмаган жиҳозлаш билан боғлиқ лойиҳаларни молиялаштиришга 26,6 миллиард сўм йўналтирилади.

• Бюджет
• ОТМ
• Xotin-qizlar