Ўрганишлар давомида 764 723 та янги иш ўрни ҳисоботларга қўшиб ёзилганлиги аниқланиб, айбдор шахслар тегишли жавобгарликка тортилди. Бу ҳақда АОКАда ўтказилган брифингда маълум қилинди.

Шунингдек, брифингда Бош прокуратура ахборот хизмати раҳбари Ҳаёт Шамсуддинов Бош прокурорнинг Ўзбекистон аҳолисига йўллаган мурожаатида қайд этилган масалалар ижроси юзасидан амалга оширилган ишлар ҳақида маълумот берди.

Унга кўра, прокурорлар секторларидаги “Темир дафтар”га киритилган 5 мингдан зиёд оилаларга ҳар томонлама кўмак берилмоқда. Жумладан, уларнинг 181 тасининг уй-жойи таъмирланиб, 57 тасига янги уй-жойлар қуриб берилиши таъминланган.

Шунингдек, 2 минг нафардан ортиқ эҳтиёжманд оиланинг ишсиз аъзолари бандлиги таъминлангани айтилди. “Аёллар” ва “Ёшлар дафтарлари”га киритилган 246 673 нафар хотин-қизлар ва 36 687 нафар ёшларнинг ҳуқуқларини ҳимоя қилиш, уларнинг ташаббусларини қўллаб-қувватлашга доир ишлар изчил давом эттирилмоқда.

Таъкидланишича, прокурорлар ташаббуси билан 582 маротаба меҳнат ярмаркалари ўтказилиб, уларда 8 минг 759 нафар ишсиз фуқаролар ишга жойлаштирилган. Иш ҳақи ва нафақа пулларининг 4,2 млрд. сўми талон-торож қилинганлиги аниқланиб, 52 та жиноят иши қўзғатилган.

Шу билан бирга, 10 789 та ҳолатда тадбиркорлик фаолиятига ноқонуний аралашув ва бюрократик тўсқинликлар аниқланиб, бартараф этилди ҳамда 8030 нафар тадбиркорларнинг бузилган ҳуқуқлари тикланган.

Бундан ташқари, хорижий инвесторлар фаолиятида юзага келган 2 426 та муаммо ижобий ҳал этилган.

• Брифинг