Бу ҳақда президент матбуот хизмати хабар қилди.

2026 йилдан пахта-ғалла, мевалар ва дуккакли экинлар бўйича ҳосилни ихтиёрий суғурталаш тизимини йўлга қўйиш таклиф этилмоқда. Ушбу тизим бўйича суғурта мукофотининг ярми давлат бюджети ҳисобидан қопланади.

Давлат томонидан қўллаб-қувватлаш тизимини соддалаштириш мақсадида Аграр соҳада тўлов агентлигини ташкил этиш режалаштирилмоқда. У ҳозирда турли идоралар томонидан тақдим этилаётган 75 турдаги субсидияни ягона рақамли платформада бирлаштиради.

Ягона агентликнинг ташкил этилиши фермерлар учун бюрократик тўсиқлар ва қоғозбозликларни сезиларли даражада камайтириши кутилмоқда. Президент бу таклифларни маъқуллади.

Иқтисодиёт ва молия вазирлиги маълумотларига кўра, 2025 йилнинг биринчи ярмида давлат бюджетидан субсидиялар учун 14,96 триллион сўм, шу жумладан, қишлоқ ва сув хўжалигига 797 миллиард сўм (2024 йилнинг шу даврида 467 млрд сўм эди) йўналтирилган:

– ғалла учун лазерли ер текислагичлар ва дон экиш сеялкалари харид қилиш учун — 182 млрд сўм;

– Қишлоқ хўжалигини давлат томонидан қўллаб-қувватлашга — 264 млрд сўм;

– пахта хомашёси ишлаб чиқарувчиларни қўллаб-қувватлаш учун — 90 млрд сўм;

– Қишлоқ хўжалиги техникасини сотиб олиш учун ажратилган лизинг ёки кредит фоизларини қоплаш учун — 85 млрд сўм;

– Фермер хўжаликлари истеъмол қилган электр энергияси таннархини қоплаш учун — 64 млрд сўм;

– Қишлоқ хўжалигида сувни тежовчи технологияларни жорий этиш учун — 73 млрд сўм;

– Наслдор чорва ва парранда сотиб олиш учун — 30 млрд сўм;

– Қорақалпоғистонда лазерли ер текислагичлар харид қилиш учун — 10 млрд сўм.

2024 йилда давлат бюджетидан субсидиялар учун жами 25,5 трлн сўм ажратилган бўлса, шундан 1 трлн 65 млрд сўми қишлоқ ва сув хўжалигига йўналтирилган.

• Ўзбекистон
• Президент
• Қарор
• қишлоқ_хўжалиги