“Кейинги йилларда Ўзбекистон тиббиёти жадал ривожланмоқда. Буни яқин-яқингача биз учун орзу бўлиб келган кўплаб даволаш усуллари ва мураккаб жарроҳлик амалиётлари маҳаллий мутахассисларимиз томонидан муваффақиятли ўзлаштирилаётгани ҳам тасдиқлайди.

Хусусан, куни кеча Тошкент давлат тиббиёт университетининг болалар кўп тармоқли клиникасида юртимиз тарихида илк бор янги турдаги операция ўтказилди.

Гап шундаки, болалар кардиожарроҳи Бобур Тўраев 6 ёшли боланинг зарарланган уч табақали клапанини олиб ташлади, ўрнига эса юракнинг ўнг бўлмаси қулоғидан клапан ясаб ўрнатди.

Технологик жиҳатдан мураккаб ҳисобланган ушбу жарроҳлик амалиёти мамлакатимизда биринчи бор ўтказилишидан ташқари, ривожланган тиббиёт марказларидагина бажарилиши билан аҳамиятлидир.

Тошкент давлат тиббиёт университетининг болалар кўп тармоқли клиникасида жорий йилнинг ўтган 8 ойида тиббиёт фанлари номзоди, бўлим мудири Нодир Иброҳимов бошчилигида 500 га яқин кардиожарроҳлик амалиётлари ўтказилди. Бунда Бобур Тўраевнинг ҳам алоҳида ҳиссаси бор.

Маълумот учун айтиш керакки, Б. Тўраев 2018 — 2019 йилларда “Эл-юрт умиди” жамғармаси стипендиати сифатида Буюк Британиянинг University College London университети магистратура босқичида таълим олган. У 10 га яқин ривожланган давлатлар клиникаларида малака оширган ва 20 га яқин илмий мақолалар муаллифи саналади. Ёш бўлишига қарамай, минг нафардан ортиқ бемор болаларда юрак операцияларини муваффақиятли бажарган.

Тошкент давлат тиббиёт университети болалар кўп тармоқли клиникасининг ушбу ютуғи соҳа вакилларини янги марралар сари илҳомлантириши, шубҳасиз” – дейилади Соғлиқни сақлаш вазирлиги берган хабарда.

• Жарроҳлик
• Шифокор
• Transplantatsiya
• Yurak