“Инвест финанс банк” АЖ реклама ахборотида истеъмолчиларни чалғитувчи маълумот бергани учун жаримага тортилди. Бу ҳақда Рақобат қўмитаси хабар берди.

Унга кўра, Рақобат қўмитаси томонидан ўтказилган ўрганишлар давомида “Инвест финанс банк” АЖнинг кредит хизмати реклама ахборотида истеъмолчиларни чалғитувчи маълумот берилганлиги аниқланган.

Жумладан, “Инвест финанс банк” АЖ томонидан Тошкент шаҳрининг бир қатор кўчаларида жойлашган LED мониторли реклама объектларида эълон қилинган “50 000 000 танишларсиз, 50 кун фоизларсиз, 5 йилга, таътил учун, таъмирлаш учун, техника учун” мазмунидаги реклама ахбороти берилганлиги кузатилган.

Мазкур реклама бўйича банкнинг расмий веб-сайти ўрганилганда, фақатгина “Инфин black” кредит картаси учун 50 миллион сўмгача, 60 ойга, йиллик 23,99 фоиздан кредит ажратилиши, картадан нақд пул ечиш 2 фоиз, картадан-картага пул ўтказиш 1 фоиз, алоҳида белгиланадиган фоиз ставкаси йиллик 25,55 фоиздан 54,75 фоизгача кўрсатилган.

Кредит бўйича қўшимча шартлар ва муҳим маълумотлар ташқи рекламада кўрсатилмаган.

Юқоридагиларга кўра, Қўмита Махсус комиссияси томонидан “Реклама тўғрисида”ги ҳамда “Истеъмолчиларнинг ҳуқуқларини ҳимоя қилиш тўғрисида”ги Қонунлар  талаблари бузилиш аломатлари юзасидан “Инвест финанс банк” АЖга нисбатан белгиланган тартибда иш қўзғатилиб, натижаси юзасидан молиявий  жарима қўллаш ҳақида қарор қабул қилинган.

Шунингдек, қонунбузилиш ҳолатини бартараф этиш ва келгусида йўл қўймаслик бўйича кўрсатма берилган.

• Bank
• raqobat