Ўзбекистондан Россияга меҳнат мигрантлари оқими камайиши мумкин. Бу ҳақда Ўзбекистон Ташқи меҳнат миграцияси агентлиги бўлим бошлиғи Алишер Рўзиев маълум қилди.

Унинг таъкидлашича, ҳозир Ўзбекистонда қурилиш соҳаси фаол ривожланмоқда, баъзи объектлардаги иш ҳақи эса Россиядаги меҳнат ҳақи билан рақобатлаша олади.

Шунингдек, “Бугунги кунда Ўзбекистонда қурилиш соҳасида кескин ўсиш бўлмоқда ва табиий равишда, биздаги иш ҳақи Россиядаги баъзи объектларники билан тенглашиб қолди. Шу сабабли ушбу вазиятда Россияга жўнаб кетаётган фуқароларимиз оқимининг пасайиш тенденцияси кузатилиши мумкин”, — деди Ташқи меҳнат миграцияси агентлиги бўлим бошлиғи.

Алишер Рўзиевнинг айтишича, Ўзбекистондаги баъзи йирик қурилиш объектларида қурилиш ихтисосликлари бўлган ишчилар ойига 500−600 доллар ишлаб топмоқда.

“Шунга кўра, бундай иш ҳақи учун Россияга бориш энди манфаатли бўлмай қолди”, — дея қўшимча қилган агентлик вакили.

Бундан ташқари, у Ўзбекистон Ташқи меҳнат миграцияси агентлиги сўнгги икки йилда фуқароларни хорижда ишга жойлаштириш географиясини сезиларли даражада кенгайтирилганини айтди.

• Миграция
• Россия