Ўзбекистонлик автофирибгар Истанбулда қўлга олинди. Бу ҳақда Ўзбекистоннинг Истанбулдаги Бош консулхонаси хабар қилди. Жабр кўрган фуқаролардан Ўзбекистон Ички ишлар вазирлиги ёхуд унинг қуйи тизимларига мурожаат қилиш сўралади.

Туркия ва Ўзбекистон Ички ишлар вазирликлари ҳамкорлигида ўтказилган тезкор тадбир давомида Истанбул шаҳрида қўлга олинган, 2015 йилдан буён автомобиль олди-сотди соҳасида кўплаб фирибгарлик жиноятларини содир этганликда айбланиб қидирувда бўлган, 1969 йилда туғилган “И.У.Б.” 2025 йил 11 январь куни Бош консулхона ходимлари иштирокида Ўзбекистон Республикасига депортация қилинган.

“Жиноий жавобгарликдан қочиб хорижий давлатларда, шу жумладан Туркияда яшириниб юрган ҳар бир шахсга нисбатан жиноий таъқиб изчил равишда давом эттирилади ва жиноят учун жавобгарлик принципи қатъий таъминланади”, – дейилади консуллик хабарида.

Бундан ташқари, Истанбул Бош консулхонаси кейинги вақтларда фирибгарлик содир этилиши ҳолатлари кўпайгани сабаб фуқаролардан фирибгарларга алданиб қолишдан огоҳ бўлишларини сўрайди.

• Истанбул
• Konsullik