“Фуқароларнинг рақамли паспорти” лойиҳасига оид Ҳукумат қарори лойиҳасига кўра, мазкур янги тартиб эвазига аҳолидан муайян фактларни тасдиқловчи ҳужжатларни талаб қилиш амалиёти бекор қилиниши мумкин.

Қайд этилишича, ушбу янгилик муаллифи АКТ вазирлиги бўлиб, унда Тошкент шаҳрида 2022 йил 15 июлдан 2023 йил 1 декабрга қадар тажриба тариқасида “Электрон ҳукумат” тизими фойдаланувчиларини идентификациялашнинг ягона ахборот тизими негизида айрим турдаги маълумот ва ҳужжатларни электрон кўринишда тақдим этиш имкониятини берувчи “OneID mobile” мобил иловасини яратишни кўзда тутувчи “Фуқаронинг рақамли мобил паспорти” лойиҳасини жорий қилиш назарда тутилади.

Ҳужжат лойиҳасида белгиланишича, Тошкент шаҳрида 2022 йил 15 июлдан бошлаб:

– Паспорт маълумотлари;

– Ҳайдовчилик гувоҳномаси маълумотлари;

– Автотранспорт воситасини рўйхатдан ўтказганлик тўғрисида гувоҳнома;

– Олий маълумот тўғрисидаги диплом ва талаба тўғрисидаги маълумотлари;

– Жисмоний шахс томонидан умумий таълим муассасасини (11-синф негизида) тамомлаганлиги тўғрисида маълумот;

– Коронавирусга қарши эмланганлик ҳолати тўғрисидаги маълумот;

– Кадастр паспорти ҳақида маълумот;

– Туғилганлик ва никоҳ қайд этилганлик ҳақидаги далолатнома маълумотлари Мобил илова орқали электрон кўринишда тақдим этилади ва улар қоғоз ҳужжатга тенглаштирилади. Яъни қоғоз ҳужжатлар билан бир хил юридик кучга эга бўлади.

Мобил илова орқали тақдим этиладиган алоҳида турдаги маълумот ва ҳужжатлар ушбу мобил иловада шакллантириладиган QR-код орқали текширилади.

Ўзбекистон фуқаролигини тасдиқловчи ҳужжати (паспорти ёки Ўзбекистон Республикаси фуқаросининг идентификация картаси) бўлган 16 ёшга тўлган шахслар электрон ҳужжатлардан мобил илова орқали фойдаланиш ҳуқуқига эга.

Мобил иловадан фойдаланишда мобил трафик учун тўлов ундирилмайди.

2023 йил 15 декабрга қадар ушбу лойиҳа тажриба натижалари асосида бошқа соҳаларда ҳамда республиканинг барча ҳудудларида татбиқ этилади.

Ўз навбатида давлат ва тижорат хизматларини кўрсатиш доирасида маъмурий тартиб-таомилларни амалга оширишда жисмоний шахслардан Мобил илова орқали тақдим этилган айрим турдаги маълумот ва ҳужжатларнинг асл нусхаларига тенглигини исботлашни талаб қилиш тақиқланади.

Эслатиб ўтамиз, ўзбекистонликларга 2011 йилдан бошлаб амалдаги биометрик паспорт берила бошлаган бўлса, 2021 йил 1 январдан бошлаб Ўзбекистон фуқароларига, фуқаролиги бўлмаган шахсларга ва Ўзбекистон ҳудудида доимий яшайдиган чет эл фуқароларига биометрик паспорт ўрнига 10 йил муддатга ID-карта бериладиган бўлди.

• Ҳукумат
• Маълумотнома
• Паспорт
• Тошкент
• Янгилик