ИИВ хабарига кўра, Дастлаб, 1993 йилда туғилган фуқаро бошқарувидаги Cobalt автомобилини кўздан кечириш натижасида транспорт воситасидан 83 грамм “мефедрон” синтетик гиёҳвандлик воситаси топилган. Шундан сўнг Юнусобод туманида ўтказилган тезкор тадбир давомида 2007 йилда туғилган жиноий гуруҳнинг яна уч нафар аъзоси қўлга олинган.

Уларнинг ёнидаги сумкадан 730 та қадоқланган доза “мефедрон” мусодара қилинди, улар ижарага олган хонадонда эса 354 та ўрамда “альфа-ПВП” ва 500 грамм “мефедрон” топилган.

Аниқланган жиноий гуруҳ етакчисини қўлга олишга қаратилган тезкор-қидирув тадбири давомида 1984 йилда туғилган асосий омбор мудири ушланиб, унинг 1996 йилда туғилган турмуш ўртоғининг яшаш жойида зудлик билан тезкор-қидирув ҳаракатлари ўтказилади.

Хонадондан 4 кг 200 грамм “альфа-ПВП” ва 9 кг “мефедрон” ҳамда гиёҳванд моддаларни қадоқлашда ишлатиладиган бошқа ашёвий далиллар олинади.

Тезкор-қидирув тадбирлари натижасида аҳоли орасида 17 кг миқдоридаги синтетик гиёҳвандлик воситаларининг тарқалишига чек қўйилган.

Мазкур ҳолат юзасидан Жиноят кодексининг 273-моддаси бешинчи қисми билан жиноят иши қўзғатилиб, гумонланувчиларга нисбатан қамоққа олиш тарзидаги эҳтиёт чораси қўлланилган.

• Гиёҳвандлик
• ИИВ
• Жиноят