Парижда ўтаётган ёзги Паралимпия ўйинларининг ортда қолган учинчи кунги мусобақалари ўзбекистонлик паралимпиячилар учун омадли кечди.

Делегациямиз 5 та олтин, 3 та кумуш, 3 та бронза медали билан умумжамоа ҳисобида 7-ўринга кўтарилиб олди. Паралимпия ўйинларига мезбонлик қилаётган Франция кеча 7-ўринни банд этганди. Энди эса 3 та олтин, 6 та кумуш, 8 та бронза медали билан 8-ўринда бормоқда.

Хитой паралимпиячилари 20 та олтин, 15 та кумуш, 7 та бронза, жами 42 та медаль билан пешқадамлик қилмоқда. 11 та олтин, 8 та кумуш, 6 та бронза медалига эга Буюк Британия иккинчи, Бразилия делегацияси 8 та олтин, 3 та кумуш, 12 та бронза медали билан кучли учликдан жой олган.

Бугун, 1 сентябрь куни Паралимпия ўйинларининг тўртинчи кунги баҳсларида 15 та спорт турида беллашувлар ўтказилса, ўзбекистонлик матонатли паралимпиячилар пара академик эшкак эшиш ва пара енгил атлетика мусобақаларида иштирок этади.

Спортчиларимиздан Муҳайё Абдусатторова пара академик эшкак эшиш дастурида ўз омадини синовдан ўтказади. Пара енгил атлетика мусобақаларида эса Ёқутхон Холбекова Т12 дастурининг узунликка сакраш баҳсларида, Дониёр Аҳмедов Т13нинг 100 метрга югуриш мусобақаларида иштирок этади.

• Паралимпия