Покистоннинг Хайбер-Пахтунхва вилоятидаги портлашларда етти нафар аскар ҳалок бўлди. Бу ҳақда “Анадулу” хабар берди.

“Dawn” газетасига кўра, Покистон Армияси Жамоатчилик билан алоқалар бўлими (ИСПР) баёнотида айтилишича, Шимолий Вазиристон вилоятидаги ҳарбий постга бомба ўрнатилган автомобиль билан ҳужум уюштирилган. Сўнгра “бир неча худкушлик ҳужуми” содир этилган.

Баёнотда ҳужум натижасида 5 нафар ҳарбийнинг ҳалок бўлгани билдирилган. Ҳужумни уюштирган террористларга қарши олиб борилган операция чоғида воқеадан кейин 2 нафар зобит ҳалок бўлди. 6 нафар қуролли жангари хавфсизлик кучлари томонидан зарарсизлантирилган.

Бош вазирликдан берилган баёнотга кўра, Бош вазир Шаҳбoз Шариф, “қўрқоқлик” деб атаган ҳужумни қоралади: “Мен ва бутун халқимиз жонини фидо қилган шаҳидларимиз билан фахрланамиз”.

Президент Асиф Али Зардарий Х ижтимоий медиа орқали қилган баёнотида, Покистон терроризмни бутунлай йўқ қилишга қарор қилганини таъкидлаб, ҳужумда ҳалок бўлган офицер ва аскарларнинг оилалари ва яқинларига ҳамдардлик билдирди.

• Покистон
• Теракт