Ижтимоий тармоқларда сўнгги кунларда аҳолининг йўллардаги чуқурларни ўзлари тўлдираётгани тасвирланган видеолар тарқалмоқда. Тошкент шаҳар ҳокимлиги ушбу ҳолат юзасидан тушунтириш берди.

Маълум қилинишича, бугунги кунда шаҳар ҳокимлиги ва туман ҳокимликлари йўл қопламасини таъмирлаш бўйича режали ва кенг кўламли ишларни олиб бормоқда. Бу ишларга фрезерлаш, тозалаш, асфальт ётқизиш ва уни махсус техникалар ёрдамида зичлаш киради. Ушбу тадбирлар белгиланган технологик талаблар асосида, сифатли материаллардан фойдаланган ҳолда, шунингдек, ишлар пайтида хавфсизликни таъминлаш учун ЙҲХББ ходимларини жалб этган ҳолда амалга оширилмоқда.

Чуқурчага совуқ аралашма тўлдириб, қўлдаги воситалар билан зичлаш усули тўлиқ таъмирлаш ҳисобланмайди. Бундай усул муаммони ҳал қилмасдан қолмай, балки баъзи ҳолларда вазиятни яна-да мураккаблаштириши, транспорт ҳаракатига ва таъмирлаш ташаббускорларининг ўзларига қўшимча хавф туғдириши мумкин.

“Таъмирлаш ташаббускорларини йўлларни ўзбошимчалик билан ямашдан тийилишга ва тоқатли бўлишга чақирамиз. Барча зарур таъмирлаш ишлари тасдиқланган жадвал асосида ва техник меъёрларга риоя қилган ҳолда бажарилмоқда”, – дейилади хабарда.

Ҳокимлик фаол фуқаролик позицияси учун шаҳарликларга миннатдорчилик билдирган.

“Ушбу ғайратни янада самарали йўналтиришга ундаймиз — Халқ назорати порталига мурожаатлар юборинг, нотўғри таъмирлаш ҳолатларини суратлар билан қайд этинг ва ижрони кузатиб боринг. Фаоллигингиз шаҳримизни янада яхшилашга ёрдам беради”, – дея қўшимча қилинган хабарда.

Тошкент шаҳрида 7 мартдан кўча-йўл тармоғини таъмирлаш ва реконструкция қилиш бўйича ишлар бошланган эди. Таҳлилларга кўра, 2025 йилда жорий ва капитал таъмирлаш талаб қилинадиган кўчалар рўйхатини ўз ичига олган манзилли таъмирлаш дастури ишлаб чиқилди. Дастур доирасида умумий майдони 65 минг квадрат метрдан ортиқ бўлган йўлларни таъмирлаш режалаштирилган.

• Ҳокимлик
• Мурожаат
• Тошкент
• Йўл қурилиш