Туркия Президенти Ражаб Тоййип Эрдоған 27 апрел куни мамлакатга Россия Президенти Владимир Путин ташриф буюриши мумкинлигини маълум қилди. Аввалроқ у айнан шу куни Мерсиндаги “Аккую” атом электр станциясига ядро ёқилғиси етказиб бериш режалаштирилганини айтганди.

“27 апрелда, балки, жаноб Путин ҳам келади ёки биз онлайн боғланиб, биринчи қадамни қўямиз, деган умиддаман”, – дейди Эрдоған “A Haber” телеканалига берган интервьюсида.

“РИА Новости”нинг ёзишича, Туркиядаги “Аккую” АЭС қурилиши майдончасига ядро ёнилғиси етказиб берилади ва ўша ердаги янги ёнилғи сақлаш манзилига жойлаштирилади. Ёнилғи етказиб берилган ондан бошлаб “Аккую” ядровий иншоотга, Туркия эса атом энергетикаси мавжуд мамлакатга айланади.

Эслатиб ўтиш мумкин, Россия иштирокида қурилаётган мазкур мажмуа Туркиядаги биринчи атом электр станцияси. Иншоотнинг 4 блоги Россиянинг илғор “ВВЭР-1200” реакторлари билан жиҳозланади. Ушбу ускуналарнинг ҳаммаси ишга тушгач, станция йилига 35 миллиард киловатт-соатга яқин электр энергияси ишлаб чиқаради. Бу миқдор мамлакатнинг электр энергиясига бўлган 10 фоиз эҳтиёжини қоплаши кўзда тутилган.