Қирғизистоннинг Жалолобод вилоятида яна бир ерости йўли топилган, у орқали одамлар ва контрабанда товарлари Ўзбекистон ҳудудига ноқонуний олиб ўтилган. Бу ҳақда Қирғизистон ИИВ хабар қилди.

Қайд этилишича, 5 апрель куни Ўш вилояти ИИБ ходимлари Қирғизистон чегарасини ноқонуний кесиб ўтган Ўзбекистон фуқароси 1984 йилда туғилган Х.Б.ни қўлга олишган.

Текширув давомида у Қирғизистонга икки давлатни боғлайдиган яширин туннель орқали қонуний чегарани четлаб ўтгани маълум бўлган.

Полиция Қирғизистон Жиноят кодексининг 168-моддаси “Ноқонуний миграцияни ташкил этиш, мигрантларни ноқонуний олиб кириш” моддаси бўйича жиноят иши очган.

12 апрелга ўтар кечаси Ноокен туманида маҳаллий фуқаро қўлга олинган. У Қирғизистон-Ўзбекистон чегарасини ноқонуний кесиб ўтишни пул эвазига ташкил қилганликда гумонланмоқда.

Полиция маълумотларига кўра, қўлга олиш чоғида гумонланувчидан махсус белгили валюта ва тунги кўриш дурбинлари мусодара қилинган.

Шунингдек, унинг уйидан дастлабки қиймати қарийб 30 минг долларга тенг 87 қути наркотик модда топилган.

• Чегара
• Қирғизистон