Қирғиз нашрларининг хабар қилишича, Жогорку Кенеш йиғилишида депутатлар “Қирғизистон Республикасининг давлат рамзлари тўғрисида”ги қонунга ўзгартишлар киритиш ҳақида”ги қонун лойиҳасини биринчи ўқишда кўриб чиққан ва қабул қилган.
Қонун лойиҳаси ташаббускорлари – Жогорку Кенеш депутатлари Нурланбек Шакиев, Улан Примов бўлган.

Ташаббусчилардан бири, депутат Улан Примов қонун лойиҳаси асосий давлат рамзларидан бири – Қирғизистон Республикаси байроғини такомиллаштиришга қаратилганини таъкидлади. Қирғизистон Республикаси байроғидаги нурлар шаклини тўлқинсимон шаклдан қуёш нурларини аниқ эслатувчи шаклга ўзгартириш таклиф қилинмоқда.

Қирғизистон Республикаси байроғидаги қуёш нурларининг янги эскизини ишлаб чиқиш учун дастлабки босқичда ушбу байроқнинг муаллифлари, ишлаб чиқувчилари жалб қилинган, улар математик ҳисоб-китоблар, чизмалар ва тегишли ишларни амалга оширган. Улан Примов бир қатор давлатлар байроқларини, хусусан, АҚШда 26 марта, Испанияда 8 марта, Россияда 1 марта байроқларини ўзгартирганини таъкидлади. Шунингдек, у Қирғизистон байроғини ўзгартириш республика бюджетидан харажатларга олиб келмаслигини таъкидлаган.

• Байроқ
• Қирғизистон