Ижтимоий тармоқларда Қўқонда 1 килоси 3 500 АҚШ доллари бўлган “олтинли” ош дамланаётгани айтилган видеохабарларга Ўзбекистон мусулмонлари идораси Фатво маркази муносабат билдирди.

Маълум қилинишича, олтиннинг ўзини ейиш ёки уни бирор таомга қўшиб тановул қилиш Ислом динида дуруст эмас.

“Аслида олтин ва кумуш нақд пул ҳамда аёлларга зийнат қилиб яратилган. Уни ейдиган нарсага айлантириш жоиз эмас. Бундай қилиш шаръий ва инсоний урфга зиддир. Чунки бирор бир миллат, дин ёки жамият олтин ва кумушни таом сифатида қабул қилмаган.

Шунингдек, олтин ва кумушдан ясалган идишларда таомланиш ва ичиш ҳам жоиз эмас.

Уламоларимизнинг сўзларига кўра, бу қайтариқнинг сабаби олтин ва кумуш идишларда еб-ичиш кибр ҳамда фахрга олиб боради ва фақир инсонларнинг кўнглини синдиради. Ушбу салбий сифатлар олтинни идиш сифатида ишлатгандан кўра, олтинни истеъмол қилишда кўпроқ топилади. Бу эса ўз навбатида инсон қалбидаги бандалик сифатини йўқолишига сабаб бўлади”, – дейилади хабарда.

• Фарғона
• Олтин
• O‘zbekiston musulmonlari idorasi
• Палов