Кеча, 4 ноябрь куни Туркия Президенти Ражаб Тоййиб Эрдўған давлат ташрифи билан Қирғизистонга етиб борган. У 6 ноябрь куни бўлиб ўтадиган Туркий давлатлар ташкилоти Давлат раҳбарлари кенгашининг 11-саммитида иштирок этади. Бу ҳақда “24.кг” хабар бермоқда.

Туркия раҳбари ва биринчи хоним Эмине Эрдўғанни Бишкек шаҳридаги “Манас” халқаро аэропортида Президент Садир Жапаров кутиб олган.

Таъкидланишича, ташриф доирасида Қирғизистон ва Туркия раҳбарларининг тор доирадаги музокаралари, шунингдек, улар раислигида стратегик ҳамкорлик бўйича Олий кенгашнинг олтинчи йиғилиши бўлиб ўтиши белгиланган.

Бундан ташқари, ташриф якунлари бўйича икки давлат ўртасидаги стратегик ҳамкорликни кенгайтириш ва давлатлараро муносабатларни янада мустаҳкамлашга қаратилган қатор икки томонлама ҳужжатлар имзоланиши режалаштирилган. Шунингдек, томонлар қирғиз-турк ҳамкорлигига оид кенг кўламли масалаларни муҳокама қилади.

• Эрдоған
• Президент
• Қирғизистон
• Ташриф
• Туркия