Чеченистон раҳбари айбловларни Россия ва Ўзбекистон ўртасида келишмовчилик келтириб чиқармоқчи бўлган учинчи шахслар томонидан провокация мақсадида ўйлаб топилганини айтди.

Чеченистон Республикаси раҳбари Рамзан Қодиров президент маъмуриятининг собиқ ходими Комил Алламжонов бўлган автомобилни ўққа тутишда иштирок этганликда гумонлангандан сўнг ушбу айбловларга жавоб берди.

“Бир неча ҳафта олдин Ўзбекистонда мамлакат президенти маъмуриятининг собиқ амалдори бўлган машина ўққа тутилган. Ҳеч ким зарар кўрмаган. Гумон қилинувчилардан бири аллақачон ҳибсга олинган, тергов барча иштирокчиларни ва суиқасд сабабларини аниқлаши керак. Аммо натижаларни кутмасдан, ғарбпараст ва мамлакатдаги баъзи мухолифат оммавий ахборот воситалари “чечен изи” ҳақидаги версияни ўйлаб топдилар ва бу изни менга олиб келишди”, – деб ёзди у ўзининг Телеграм каналида.

Рамзан Қодиров бу маълумотни Россия ва Ўзбекистон ўртасида келишмовчилик юзага келтирмоқчи бўлган учинчи шахсларнинг провокацион сиёсий ўйин воситаси деб атади.

“Ўзбекистонда ҳурматли президент Шавкат Миромонович Мирзиёевнинг доно сиёсати туфайли барча соҳаларда, шу жумладан ахборот ва ҳуқуқни муҳофаза қилиш соҳасида ишлар мукаммал тарзда қурилган. Мен шуни қўшимча қиламанки, агар мен ҳақиқатан ҳам бирор нарсани режалаштирган бўлсам, унда мен ишни охиригача ва 100 фоиз натижа билан якунлайман. Чеченлар ва ўзбеклар умумий тарихий ўтмишга эга бўлган қардош халқлардир. Бизни кўп нарса боғлайди. Шахсан мен учун Ўзбекистон азиз Отам Ахмат-Хожи ҳаётининг алоҳида ва муҳим қисмидир. У ўзбек халқини ва унинг урф-одатларини яхши кўрар эди”, – деб ёзган Рамзан Қодиров.

Шунингдек, у ушбу провокацияга алоқадор шахсларни аниқлаш бўйича ишлар олиб борилаётганини қўшимча қилган.

Эслатиб ўтамиз, 26 октябрь куни номаълум шахслар президент маъмуриятининг собиқ ходими Комил Алламжонов бўлган машинага бир неча марта ўқ узишган эди.

• Комил Алламжонов
• Ramzan Qodirov