Чеченистон раҳбари Рамзан Қодировнинг қизи Айшат Қодирова бош вазирнинг ижтимоий блок бўйича ўринбосари этиб тайинланди. Бу ҳақда мамлакат президенти ўзининг телеграм каналида маълум қилди.

Бунгача Айшат Қодирова республика маданият вазири лавозимида ишлаб келаётган эди. Энди унинг ўрнини Чеченистон бош вазирининг собиқ ўринбосари Муса Дадаев эгаллайди. Чеченистон раҳбарининг айтишича, қизини бу лавозимга тайинлаш таклифи республика ҳукумати раиси Муслим Хучиев томонидан илгари сурилган.

“Албатта, Айшат Қодирова вилоят Маданият вазирлиги фаолиятини такомиллаштиришга катта ҳисса қўшган ва катта иш тажрибасини тўплаган”, – дейди Рамзан Қодиров.

4-сентябр куни Путин Айшат Қодировани II даражали “Ватан олдидаги хизматлари учун” ордени билан тақдирлаганди. Ҳужжатга кўра, 24 ёшли Қодирова бир қанча одамлар қатори “миллий маданият ва санъатни ривожлантиришдаги хизматлари, кўп йиллик самарали ижодий фаолияти учун” тақдирланган.

Айшат Қодирова 2021 йилнинг октябридан Чеченистон маданият вазири лавозимида ишлаб келаётганди. Бунгача у бир йил Чеченистон Маданият вазирлиги раҳбарининг биринчи ўринбосари сифатида фаолият олиб борган.

• Checheniston
• Ramzan Qodirov