Ижтимоий тармоқларда тарқалган хабар юзасидан Соғлиқни сақлаш вазирлиги расмий муносабат билдирди.

Қайд этилишича, янги йил арафасида Республика ихтисослаштирилган педиатрия илмий-амалий тиббиёт марказининг жами бешта — Чақалоқларни парвариш қилиш, Чақалоқлар патологияси ва реанимацияси, Гепатология, Нефрология ҳамда Умумий педиатрия бўлимида профилактик ювиш-тозалаш ва зарарсизлантириш ишлари амалга оширилган.

Маълум қилинишича, ушбу бўлимларнинг барчаси бугун, 6 январь кунидан қайта очилган ва бу ҳолат табиий равишда беморлар оқими нисбатан ортишига сабаб бўлган.

Бундан ташқари, марказ ижтимоий тармоқлардаги хабарларда қайд этилган юқумли касалликларга чалинган беморларни қабул қилиш ва даволашга ихтисослаштирилмаган.

“Шундай экан, Соғлиқни сақлаш вазирлиги ижтимоий тармоқ фойдаланувчиларидан турли асоссиз ва текширилмаган хабарлар тарқатмасликни сўрайди”, – дейилади Соғлиқни сақлаш вазирлиги хабарида.

• Касаллик
• SSV
• Вирус