Ҳиндистон ҳукуматига кўра, Украинадаги урушда камида 26 нафар ҳиндистонлик ҳалок бўлган, яна 7 нафари бедарак йўқолган. Шу пайтгача 100 нафардан ортиқ фуқаро Ҳиндистонга қайтарилган. Айни пайтда тахминан 50 нафар ҳиндистонликни ватанга қайтариш масаласида Москва билан музокаралар олиб борилмоқда.

“Жабрланганларнинг қариндошлари ёллаш жараёни воситачилар ва агентлар орқали амалга оширилганини билдирди. Улар ёш йигитларни Россияда қонуний иш, юқори маош ва яшаш шароитлари ваъдалари билан жалб қилган. Бироқ Ҳиндистондан келганлар Россияга етиб боргач, мазмунини тушунмаган рус тилидаги шартномаларни имзолашга мажбур қилинган ва шундан сўнг тўғридан-тўғри жанговар ҳудудга юборилган”, – дея ёзмоқда BBC.

2024 йил июлида Россия президенти Владимир Путин Украина урушида иштирок этиш учун ёлланган барча Ҳиндистон фуқароларини Россия армиясидан озод қилишга ваъда берганди. Бу баёнот Ҳиндистон бош вазири Нарендра Модининг Москвага ташрифи чоғида билдирган талабидан сўнг янграган. Ўша йилнинг сентябрида 45 нафар ҳиндистонлик Россия армияси сафидан чиқарилганди.

Россиянинг Украинага қарши урушда иштирок этиш учун чет эл фуқароларини ёллаши фақат Ҳиндистон билан чекланмайди. Урушда Россия томонида Непал, Сомали, Индонезия, Сурия, Куба, Сербия, Шри-Ланка, Хитой ва айрим Марказий Осиё давлатларидан ёлланма жангчилар қатнашаётгани ҳақида ҳам маълумотлар мавжуд.

Шунингдек, бу ҳақда Украинанинг “Хочу жить” лойиҳасида маълумот берилган.

• Ҳиндистон
• Россия
• Украина
• Уруш
• fuqaro