Саудия Арабистони ва Бирлашган Араб Амирликлари Покистон фуқароларига нисбатан миграция назоратини кескин кучайтирди. Расмий маълумотларга кўра, 2025 йилнинг ўзида Саудия Арабистони тиланчиликда гумон қилинган тахминан 24 минг нафар Покистон фуқаросини депортация қилган. Ваколатли идоралар бу чораларни уюшган тиланчилик ва жиноятчиликка қарши кураш доирасида изоҳлаган.

Покистон Федерал тергов агентлиги бош директори маълум қилишича, сўнгги йилларда чет элларда покистонликларга боғлиқ уюшган тиланчилик ва жиноят тармоқлари сезиларли даражада кўпайган. Унинг таъкидлашича, бу ҳолат мамлакатнинг халқаро имижига жиддий зарар етказмоқда.

Маълумотларга кўра, Дубай маъмурияти ҳам шунга ўхшаш сабаблар билан 6 минг нафарга яқин Покистон фуқаросини БААдан чиқариб юборган. Озарбайжонда эса тахминан 2,5 минг нафар покистонлик тиланчи депортация қилингани расман тасдиқланган. Мутасаддилар бундай ҳолатлар Африка ва Европа давлатларида ҳам кузатилаётганини қайд этмоқда.

Шунингдек, Камбоджа ва Таиланд каби давлатларга берилган туристик визаларнинг суиистеъмол қилиниши ҳам хавотир уйғотган. Айрим гуруҳлар турли виза турларидан фойдаланиб, тиланчилик ва бошқа ноқонуний фаолият билан шуғулланмоқда.

Муаммо 2024 йилда Саудия Арабистони томонидан берилган қатъий огоҳлантиришлар ортидан янада очиқ кўриниш олган. Ар-Риёд маъмурияти Умра визалари орқали келган айрим Покистон фуқароларининг тиланчиликка аралашганини билдириб, Исломободдан қатъий чоралар кўришни талаб қилган.

Покистон ҳукумати эса ушбу ҳолатларни бартараф этиш учун ички текширувлар ва назорат механизмларини кучайтиришга ваъда бермоқда.

• Депортация
• Покистон
• Саудия Арабистони