Чеченистон раҳбари Рамзан Қодиров бугун, 29 октябрь куни республикадаги Россия махсус кучлари университети дрон ҳужумига учраганини маълум қилди. Бу ҳақда Қодиров ўзининг Telegram каналида хабар берди.

“Бугун эрталаб соат 6:30 да Гудермесда учувчисиз қурилма ҳужуми натижасида Россия махсус кучлари университети ҳудудидаги бўш бинонинг томи ёниб кетди. Қурбонлар ва жабрланганлар йўқ. Ёнғин ўчирилган”, – деди Қодиров.

Қайд этилишича, ҳозирда тергов органлари ҳужум юзасидан текширув олиб бормоқда. Университет фаолияти тўхтатилмаган, барча хизматлар одатдаги тартибда ишини давом эттирмоқда.

Маълумот учун, Россия махсус кучлари университети жанговар зоналарга юбориш учун ҳарбийларни ҳам тайёрлайди. Оммавий ахборот воситалари уни Россиядаги энг йирик ёллаш марказларидан бири сифатида тилга олади.

• Checheniston
• Ramzan Qodirov