Россия Давлат думасининг МДҲ ишлари бўйича қўмитаси миграция соҳасида назоратни кучайтириш, жумладан, муҳожирларни чиқариб юбориш режимига оид қонун лойиҳасини биринчи ўқишда маъқуллади. Бу ҳақда “Интерфакс” хабар берди.

Депортациянинг янги тартиби Россияда ноқонуний бўлиб турган хорижликларга нисбатан қўлланилади. Бунда Россияда вақтинча бўлиш ёки миграция ҳужжатларининг муддати тугагани, вақтинчалик яшаш учун рухсатноманинг бекор қилингани ва бошқа ноқонуний хатти-ҳаракатлар инобатга олинади.

Мигрант Россиядан чиқиб кетган, ҳуқуқий ҳолати тартибга солинган ёки ўлим ҳолати кузатилганда унга нисбатан режим бекор қилинади. Чиқариб юбориш режимини жорий этиш Россияда ноқонуний бўлган хорижликнинг қуйидаги ҳуқуқларини чеклашни назарда тутади:

— ички ишлар органининг рухсатисиз Россияда яшаш ёки яшаш жойини ўзгартириш;

— назорат остидаги шахс яшайдиган Россия субъектидан ташқарида саёҳат қилиш;

— транспорт воситаларини бошқариш, ҳайдовчилик гувоҳномасини олиш;

— кўчмас мулк, транспорт воситалар олиш ёки ўзлаштириш, ушбу мулкни давлат органларида рўйхатдан ўтказиш;

— никоҳни рўйхатга олиш;

— якка тартибдаги тадбиркор сифатида рўйхатдан ўтиш;

— кредит шартномасини тузиш, банк ҳисобварақларини очиш, пул ўтказмаларини амалга ошириш ва бошқа йўллар билан Россиядаги банклар ва бошқа кредит ташкилотларидаги ҳисобварақлардаги маблағларни бошқариш.

Бундан ташқари, ҳуқуқ-тартибот идоралари ходимлари назорат остидаги шахс бўлган бинолар ва ҳудудларга қаршиликсиз кириши мумкин бўлади.

• Миграция
• Россия