Россиянинг Киев ва бошқа вилоятлардаги янги қатор ракета ҳужумларидан сўнг Украинанинг миллионлаб аҳолиси электр ва сувсиз қолди. Бу ҳақда БМТ матбуот хизмати хабар қилди.

БМТ матбуот котиби Стефан Дюжаррикнинг сўзларига кўра, Одессада электр узатиш линиялари шикастлангани сабабли сув таъминоти узилиб қолган, чунки сув стансиялари энергиясиз ишламайди. У ерда, шунингдек, Днепрда, иситиш тизими ҳам шикастланган. Бундан ташқари, Киев вилоятининг 40 фоизга яқини электр энергиясисиз қолган.

“Гуманитар соҳадаги ҳамкасбларимиз қайд этишича, ҳужумлар Украинанинг энергетика тизимига қўшимча зарар етказган, мамлакатнинг кўп қисмини совуқ босиб кетган ва Киевда ҳаво ҳарорати минус саккиз даражагача тушган”, — деди Дюжаррик.

Унинг таъкидлашича, энергетика тизимига давом этаётган ҳужумлар миллионлаб тинч аҳоли, айниқса фронтга яқин ҳудудлардаги вазиятни янада оғирлаштирмоқда. Келаётган совуқ об-ҳаво фонида одамлар ёруг֮ълик, иссиқлик ва сувсиз қолди.

Гуманитар ташкилотлар Украина ҳукуматини инқироз ҳолатида аҳоли бошпана топиши мумкин бўлган шифохоналар ва иссиқлик пунктларига генераторлар етказиб бериш орқали қўллаб-қувватлашда давом этмоқда.

“Биз аллақачон 400 та генераторни етказиб бердик ва яна тез орада етиб келиши керак. Шунингдек, 630 минг кишини иссиқ кийим, иситиш мосламалари ва биноларни таъмирлаш учун материаллар билан таъминладик”,– деди Дюжаррик.

• БМТ
• Qish mavsumi
• Россия
• Украина