Самарқандда қурилаётган янги халқаро аэропорт сабаб мазкур ҳудуддаги 100 га яқин уйлар бузилишга тушган.

Бир қараганда, ҳаммаси қонуний – давлат ва жамоат эҳтиёжлари учун аҳоли яшаб турган уйларидан кўчириляпти ва бу табиийдек туюлади кишига. Аммо бу ерда яшаб келган 50 тага яқин хўжалик мулкларининг арзон баҳоланаётганидан норози. Камига эса маҳаллий ҳокимлик ва тегишли идоралар уларнинг уйларини ташлаб чиқиб кетишига “маданийчасига” мажбурлашмоқда.

Гап шундаки, Xabardor.uz таҳририятига Самарқанд шаҳри 2-сектор ҳудудига кирувчи Зарафшон маҳалласидан мурожаат келиб тушди. Унда айтилишича, шаҳарда янги халқаро аэропорт қурилаётгани боис уларга бундан 3 ойлар муқаддам уйлари бузилиши, яъни “снос”га тушгани ҳақида огоҳлантиришган. Ва бирин-кетин одамлар бузилишга тушган уйларига компенсация олиб, ҳовлисини ташлаб чиқиб кета бошлаган. Аммо ҳозирги кунда 50 тадан ортиқ хўжалик мазкур ҳудудда яшаб келмоқда.

Уларнинг иддаосича, ҳокимлик ҳовли-жойларни баҳолашда бозор нархларига мос тартибда иш олиб бормаяпти.

“6 сотих ҳовлимиз бор. 7 хонали, шундан 4 та хонаси янги тушган, яхши таъмирланган эди. Ҳозирда ҳокимият таклиф қилаётган нархга мен бозордан ўзимникидай шароитли уйни харид қилолмайман-ку. Ҳовли-жойларимизни бозор нархларида баҳолашсин, марҳамат. Бизнинг олиб борилаётган ислоҳотларга асло қаршилигимиз йўқ”, – дейди маҳаллий аҳолидан бири.

Унинг айтишича, айрим маҳаллий аҳолининг соддалигидан фойдаланиб, оғзаки савдода 40 минг АҚШ долларига баҳоланган уйлар учун ҳужжатда 400 миллион сўм (бу уй эгасининг ўша кунги Марказий банк курси бўйича тахминан 40 миллион сўм зарар кўрди деганидир, -таҳр.) кўрсатилиб, имзолатиб олишлар ҳам кузатилган.

Кўтарилган ушбу масаланинг энг “қаймоғи” эса 3 кун олдин, 24 апрел куни содир бўлган. Мурожаатда айтилишича, ўша куни ҳудудий электр тармоқлари ходимлари маҳаллани электрдан тўлиқ узиб кетган. Айни пайтда 50 тадан ортиқ хўжалик мана 4-кундирки электрсиз қолдирилган уйларда яшашяпти. Аҳолининг Рамазонда қийналиб қолишлари ҳақидаги илтижолари ҳам эътиборсиз қолдирилган.

“Бизларни уйларимизни ташлаб чиқиб кетишга мажбурлашмоқчи. “Свет”имизни асосий манбадан узиб кетишди. Бунга ҳақи бормиди, уларнинг?! Биз ҳам одаммизку, келиб уйларимизга бозор нархларида компенсация таклиф қилишса, Ҳукумат ишига қаршилигимиз йўқ бизниям”, – дейди мурожаатчи.

Уларнинг фуқаро сифатидаги суриштирувларига эса шаҳар элект тармоқлари мутасаддилари аввалига “юқори”дан буйруқ бўлганини, аммо бир муддат ўтиб эса маҳалланинг электр манбаси алмаштирилаётгани ва тез орада бошқа “линия”га ўтказиб беришларини айтади. Аммо бу қанча вақтгача чўзилиши ҳақидаги саволлар очиқ қолади.

Шу ўринда савол туғилади: “снос”га тушган уй эгаларини ҳокимлик таклиф қилган компенсация миқдорига кўндиришнинг “самарқандча усул”ими бу? Бу борада қонунчилик, қонун ҳимоячилари нима дейди? Гап бир ё икки хўжалик тўғрисида эмас, 50 дан ортиқ хўжалик ҳақида кетяпти, бу ерда. Ҳукуматнинг 2019 йил 16 ноябрдаги 911-сон қарорига мувофиқ “ер эгасининг розилиги” талаб қилинмай қўйганми?!

Болаликдан 1-гуруҳ ногирони бўлган фарзандига ғамхўрлик қилиб келаётган катта ёшли аёл 2 кунлик электрсизликдан қийналиб, ерлик аҳолининг табиий газини узиб қўйганига кўп бўлгани, энди икки кундан буён электр таъминотисиз қолаётганинидан шикоят қилади.

“Фарзандимнинг ногиронлиги сабаб 50 ёшимдан пенсияга чиққанман. Мана икки кундан электрни узиб кетишди. Шу инсофданми? Ногирон болам билан қийналиб ўтирибмиз. Чой ва овқатимизни қўлбола суюлтирилган газда қилиб еяпмиз. Биз фақат давлат берадиган пенсия пулларига қараммиз. Энди ҳовлига нимадир экайлик десак, сувни узиб қўйишган, чироқ беришмаяпти.

Уй масаласига келсак, уни бозор нархларида баҳолашларини сўраб порталга (Президент портали, -таҳр.) ҳам мурожаат қилдик. Улар нима қилишди: ҳокимиятга “ўрганиб чиқиш учун” қайтаришди. А, биз кимдан шикоят қилгандик, ҳокимиятданмасми?” – дейди мурожаатининг идораларни айланиб юришидан норози аёл.

Xabardor.uz таҳририяти Самарқанд вилояти ҳамда Самарқанд шаҳри ҳокимликларининг, шунингдек, “Самарқанд ҳудудий электр тармоқлари корхонаси” АЖнинг мазкур масалага эътибор қаратишларига ҳамда ҳақли эътирозларга сабаб бўлаётган масалаларда маҳаллий аҳолининг муаммоларини тез орада ҳал қилиб беришларига умид қилади.

Таҳририят мазкур вазиятни кузатишда давом этади.

• Электр энергияси
• Мурожаат
• Самарқанд
• Снос