Самарқандда озиқ-овқат хавфсизлиги бўйича халқаро конференция ўз ишини бошлади. Бу ҳақда Қишлоқ хўжалиги вазирлиги хабар берди. Ўзбекистон ҳукумати томонидан БМТ Озиқ-овқат ва қишлоқ хўжалиги ташкилоти (ФАО)нинг техник кўмагида ташкил этилган мазкур конференция 7-8 сентябрь кунлари бўлиб ўтади.

Тадбирда 15 та мамлакат қишлоқ хўжалиги вазирлари, 8 мамлакатдан вазир ўринбосарлари, 13 мамлакатнинг юқори даражадаги дипломатлари ва 30 дан зиёд халқаро ҳамда илмий ташкилотлар, шунингдек, молия институтлари вакиллари иштирок этмоқда.

“Ўзаро муҳокамалар, таклиф-мулоҳазалар ва билдирилган тавсиялар жамланиб, конференция якунида Самарқанд декларациясини қабул қилиш кўзда тутилган”, дейилади хабарда.

Шунингдек, халқаро қишлоқ хўжалиги тадқиқотлари бўйича консултатив гуруҳ билан биргаликда ташкил этиладиган давра суҳбатида ўзбекистонлик 200 нафар тадқиқотчи, шунингдек, 20 дан зиёд мамлакатдан 150 дан ортиқ хорижий олимлар қатнашиши режалаштирилган.

• Конференция
• Самарқанд
• Халқаро
• қишлоқ_хўжалиги