Кеча, 6 июнь куни Саудия Арабистони пойтахти Ар-Риёд шаҳрида Эрон Ислом Республикаси элчихонаси очилди. Бу ҳақда “Ал-Арабия” телеканали хабар берди.

Очилиш маросимида Эрон ва Саудия Арабистони ташқи ишлар вазирликлари вакиллари иштирок этди. Маросимда Эроннинг Саудия Арабистонидаги янги элчиси Алиризо Энаяти ҳам қатнашди. Илгари у Эрон ташқи ишлар вазири ёрдамчиси лавозимида ишлаган.

Теҳрон ва Ар-Риёд иқтисодиётнинг турли соҳаларида алоқаларни тиклашга келишиб олганидан уч ой ўтиб, Эрон дипломатик миссияси иши тикланди. Хабарларга кўра, келишувга Хитой воситачилигида эришилган.

Қайд этиш мумкин, Эрон ва Саудия Арабистони муносабатларини 2016 йилда узган. Ўшанда Саудия Арабистонининг Эрондаги дипломатик ваколатхоналарига уюштирилган қатор ҳужумлардан сўнг, Эрон ва Саудия Арабистони дипломатик муносабатларни узган эди.

• Elchixona
• Eron
• Саудия Арабистони