Ўзбекистон Фавқулодда вазиятлар вазирлиги ижтимоий тармоқларда Тошкент шаҳридаги саноат омборларидан бирида содир бўлган кучли портлаш ва ёнғинга самолёт ҳалокати сабаб бўлгани ҳақидаги хабарларни рад этди.

“Айрим ижтимоий тармоқларда Сергели туманидаги ҳодиса "Самолёт қулаши оқибатида содир бўлган" мазмунидаги фейк хабарлар тарқалмоқда. Бу мутлақо ҳақиқатга тўғри келмайди”, – дейилади ФВВ хабарида.

Қайд этилишича, ФВБга соат 02:43 да ёнғин содир бўлаётгани тўғрисида хабар келиб тушган. Шунга кўра, 16 та ёнғин-қутқарув экипажи ва 3 та автонарвон соат 02:48 да ҳодиса рўй берган ҳудудга етиб борган. Ҳозирда ёнғинни ўчириш ишлари амалга оширилмоқда.

Ижтимоий тармоқларда тарқалаётган видеоларда кучли портлаш овозини эшитиш мумкин. Яқин атрофдаги хонадонларга ва савдо марказларига жиддий зарар етган. Хонадонларга тез ёрдам машиналари етиб борган.

“Вазият тўлиқ назоратга олинган. Ёнғин соат 05:02 да қуршаб олинган. ФВВ ходимларининг тезкор ҳаракатлари натижасида ёнғин майдони қисқартирилиб борилмоқда. Воқеа жойида дастлабки дақиқалардан бошлаб ФВВ раҳбарияти ҳамда куч ва воситалари, шунингдек, тегишли ташкилотлар ходимлари иш олиб бормоқда. Ёнғин келиб чиқиш сабабини аниқлаш мақсадида ФВВнинг махсус лабораторияси ҳодиса жойида иш олиб бормоқда. Воқеа жойида ФВВ раҳбарлигида штаб ташкил этилган”, – дейилади хабарда.

• ФВВ
• Sergeli
• ёнғин