Аввалроқ, Наманган давлат университети олдида йигит ўз севган қизини пичоқлаб ўлдиргани ҳақида хабар берилганди. Бош прокуротура матбуот котиби Ҳаёт Шамсутдинов ҳолат юзасидан расмий маълумот берди.

Маълум қилинишича, бугун, 6 май куни соат 12:00 да Наманган давлат университети олдида 26 ёшли эркак ўзининг 23 ёшли турмуш ўртоғини хўжалик пичоғи билан қасддан ўлдирган. Сўнг, у ўзига бир неча маротаба пичоқ билан жароҳат етказиб, ўз жонига суиқасд қилган.

Шу вақтда, воқеа жойида бўлган фуқаролар томонидан ўз жонига қасд қилган эркак шифохонага ҳушсиз ҳолатда олиб борилган.

Аниқланишича, ушбу жиноятни содир қилган шахс турмуш ўртоғи билан 2022 йилнинг январь ойидан буён ўзаро оилавий жанжал сабабли ажрашиб, бирга яшамасдан келган.

Шундан сўнг, у турмуш ўртоғини ўзи билан бирга яшашга мажбур қилиб, асоссиз рашк қилиб келган ҳолда бир неча маротаба жанжаллашиб юрган.

Ҳозирда мазкур ҳолат юзасидан Жиноят кодексининг 97-моддаси (Қасддан одам ўлдириш) билан жиноят иши қўзғатилган.

Ҳолат юзасидан тергов ҳаракатлари олиб борилмоқда.

• Қотиллик