Бугун, 2 сентябрь куни Президент Шавкат Мирзиёев Ислом Каримов номидаги илмий-маърифий ёдгорлик мажмуасига ташриф буюриб, Биринчи Президент ҳайкали пойига гулчамбар қўйди. Бу ҳақда Ўзбекистон Президенти Матбуот хизмати хабар бермоқда.

“Ислом Каримов бундан ўттиз бир йил олдин мамлакатимизнинг миллий мустақиллигини дунёга эълон қилган эди. Бу давлатчилигимизни ва инсоний ҳақ-ҳуқуқларимизни тиклаб, барча ютуқ ва марраларимизнинг замини бўлди. Шу боис, Биринчи Президентимизга ҳурмат ўз тарихимизга ҳурмат ифодасидир”, – дейилади хабарда.

Қайд этилишича, хотира тадбирида Ислом Каримовнинг халқимиз манфаати йўлидаги хизматлари ёдга олиниб, Қуръон тиловат қилинган.

Шунингдек, давлат раҳбари устозларни қадрлаш ва ҳамиша ёдга олиш кераклигини, бу эса ёш авлодга ўрнак бўлишини таъкидлаган.

Ўзбекистон Республикаси Олий Мажлиси, Президент Администрацияси, Вазирлар Маҳкамаси, вазирлик ва идоралар, пойтахт жамоатчилиги вакиллари ҳам Биринчи Президент ҳайкалига пойига гул қўйди.

Қайд этиш мумкин, худди шундай тадбирлар Самарқанд ва Қарши шаҳарларида ҳам ўтказилди.

• Ислом Каримов
• Президент
• Шавкат Мирзиёев
• Xotira