Кеча, 8 декабрь куни Хитой раҳбари Си Цзиньпин Ар-Риёддаги қироллик саройида Саудия Арабистони қироли Салмон бин Абдулазиз Ол Сауд билан учрашди.

Қайд этилишича, Си Цзиньпин олти йилдан сўнг Саудия Арабистонига яна ташриф буюрганидан жуда хурсанд эканлигини таъкидлаган. У “Хитой-Саудия муносабатларини ривожлантириш бўйича эришилган муҳим консенсус энди ҳамкорликнинг аниқ мевасига айланаётганидан хурсандман”, – дея ушбу мамлакатга сўнгги ташрифи тафсилотларини эслади ХХР раиси. Унинг сўзларига кўра, Хитой-Саудия ҳамкорлиги кенг истиқболга эга.

Си Цзиньпинга кўра Хитой Халқ Республикаси Саудия Арабистонини кўп қутбли дунёнинг муҳим кучи, деб билади ва ушбу мамлакат билан ҳар томонлама стратегик шерикликни ривожлантиришга катта аҳамият беради. Шунингдек, у Хитой Саудия билан стратегик алоқаларни янада мустаҳкамлаш, турли соҳаларда ҳамкорликни чуқурлаштириш, икки давлат тараққиёти манфаатларига хизмат қилиш, дунё тинчлиги ва барқарорлигини қўллаб-қувватлашга тайёр эканини таъкидлаган.

Салмон бин Абдулазиз Ол Сауд, ўз навбатида, Си Цзиньпиннинг мамлакатга 2016 йилдаги муваффақиятли ташрифини унутилмас, деб атади.

Қирол Саудия Арабистони ва Хитой турли соҳалардаги стратегия ва ҳамкорликни боғлашда ижобий ютуқларга эришганини айтди. Томонлар кўплаб масалаларда муҳим келишувга эришди. Қирол Хитойнинг манфаатлари Саудия Арабистонининг ҳам манфаатлари эканлигини алоҳида таъкидлаган.

“Мен Хитой билан муносабатларни ривожлантиришга катта эътибор қаратаман ва Саудия-Хитой ҳар томонлама стратегик шериклик муносабатлари икки давлатнинг дўст халқлари манфаати учун узлуксиз ривожланишини таъминлаш йўлида сиз билан бирга ишлашга тайёрман. Бу минтақа ва бутун дунёда тинчлик, барқарорлик ривожига фойда келтиради”, – деди Шайх Салмон.
Икки давлат раҳбарлари Хитой ва Саудия Арабистони ўртасида ҳар томонлама стратегик шериклик муносабатлари тўғрисидаги битимни имзолаб, ҳар икки йилда бир марта иккала мамлакатда навбат билан давлат раҳбарлари учрашувини ўтказишга келишиб олди. Шунингдек энергетика соҳаси бўйича бир нечта муҳим ҳужжатлар имзоланган.

Бугун, 9 декабрь куни Хитой раҳбари Форс кўрфази давлатларининг раҳбарлари билан учрашади.

• Музокара
• Саудия Арабистони
• Si Szinpin
• Ташриф
• Хитой