Покистонлик Минал ва Мирха исмли эгизакларнинг бош қисми қўшилиб кетган эди. Эгизакларни Британиянинг малакали жарроҳи, Great Ormond Street касалхонаси профессори Нур ул-Овасе Жилани операция қилди. У биринчи марта 3D замонавий технологияларидан фойдаланди.

Аралаш реаллик (АР) технологияси 3D тасвирларни физик дунё билан бирлаштиради. Бу мураккаб операциялар пайтида аниқликни янада ошириш учун фойдаланилади. Бунда масалан, 3D сканерлар реалликка қўшиб кўрсатилади. 

Жарроҳлик амалиётидан аввал Анқарадаги шифокорларга операция хонасида уларни нима кутаётгани ҳақида тушунчага эга бўлишлари учун эгизакларнинг уч ўлчамли модели яратилган. Шу билан вазиятни тасаввур қилишга ёрдам берилган. Британия жамоасига эса операцияга тайёргарлик кўриш ҳамда машқ қилиш имконини яратишган.

19 июль санасида Анқарада ўтказилган операция икки босқичли амалиётни талаб қилгани учун уч ойда якунланди. Охирги босқич 14 соат давом этди. 

Ҳозирда Минал ва Мирханинг аҳволи яхши. Айни дамда шифохонада даволанишмоқда. Келаси ойда улар Покистонга, яъни уйга қайтишади. Эгизакларнинг тўлиқ соғайиб кетишлари ва нормал ҳаёт тарзини яшашлари умид қилинмоқда.

• Тиббиёт