Сурхондарё вилояти, Термиз шаҳрида яшовчи 23 ёшли М.М. ИИОга мурожаат қилиб, номаълум шахс томонидан 27 миллион сўм фирибгарлик йўли билан ечиб олинганини маълум қилган.

Қайд этилишича, тезкор-қидирув тадбирларидан сўнг бу Сурхондарё вилояти, Жарқўрғон туманида яшовчи 28 ёшли К.Б.нинг ҳаракати эканлиги маълум бўлган.

Аниқланишича, К.Б. Телеграм мессенжери орқали турли хил мазмундаги ёлғон эълонлар остида сохта ҳавола жўнатиб келган. Алдовларга ишониб, сохта ҳаволага банк картаси маълумотларини киритган фуқароларнинг банк карталари бошқарувини қўлга киритган. Натижада улар ҳисобидаги пулларни ўзининг фойдаланувида бўлган банк картасига ўтказиб олган.

Мазкур ҳолат юзасидан Ўзбекистон Республикаси Жиноят кодексининг 168-моддаси 3-қисми “б”, “г" банди билан жиноят иши қўзғатилди. К.Б.нинг содир этилиб фош этилмай қолган бошқа шу турдаги жиноятларга алоқадорлигини текшириш юзасидан тезкор-суриштирув ишлари олиб борилмоқда.

Қонунга мувофиқ, Ўзбекистон Республикаси Жиноят кодексининг 168-моддаси 3-қисми “б”, “г" бандидаги жиноий хатти-ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.

• Bank karta
• Фирибгарлик
• Жиноят