Соғлиқни сақлаш вазирлиги “Omad plyus” масъулияти чекланган жамиятига нисбатан 2023 йил 28 апрель куни Зангиота туманлараро иқтисодий судига ариза билан мурожаат қилиб, унда Соғлиқни сақлаш вазирлиги томонидан “Omad plyus”масъулияти чекланган жамиятига тиббий фаолиятни амалга ошириш учун 2021 йил 16 февраль куни берилган 27390032-рақамли лицензияни бекор қилишни сўраган.

Аризада лицензияни бекор қилишнинг асослари сифатида Вазирлар Маҳкамасининг 2022 йил 21 февралдаги 80-сонли қарори билан тасдиқланган “Махсус электрон тизим орқали айрим фаолият турларини лицензиялаш тартиби тўғрисидаги ягона Низом”нинг 27-иловаси 9-банди талаблари қўпол равишда бузилганлиги, хусусан, халқ орасида “Миттивине” тахаллуси билан танилган марҳум Ф. Манноповга тиббий ёрдам кўрсатган шифокорларда малакавий тоифа мавжуд бўлмаганлиги, бирламчи тиббий ҳужжатлар лозим даражада юритилмаганлиги, тиббий техниканинг метрологик меъёрларга мослиги бўйича даврий текширув ўтказилмаганлиги каби бир қатор камчиликларга йўл қўйилганлиги, жавобгар томонидан марҳум Ф. Манноповга тиббий хизмат кўрсатишда бир қатор лисензия талаб ва шартлари бузилганлиги, ушбу ҳолатлар “Лицензиялаш, рухсат бериш ва хабардор қилиш тартиб-таомиллари тўғрисида”ги Қонуннинг 33-моддаси талабига кўра лицензияни бекор қилиш учун асос бўлиши қайд этилган.

Суднинг 2023 йил 15 майдаги муҳокамасида жавобгар адвокатининг ишни клиниканинг мансабдор шахсларига нисбатан қўзғатилган жиноят иши якунига қадар мазкур низо юзасидан иш юритишни тўхтатиб туриш тўғрисидаги оғзаки илтимосномасини қаноатлантириш рад этилиб, шу кунги муҳокама тарафлар вакилларининг илтимосномалари қаноатлантирилган ҳолда бошқа муддатга қолдирилган.

Суднинг 2023 йил 25 майдаги мажлисида жавобгарнинг адвокати юқоридаги мазмундаги илтимосномасини ёзма шаклда тақдим этиб, унга жиноят ишига дахлдор бўлган ҳужжатларни илова қилган.

Ўз навбатида аризачи вакиллари марҳум Ф. Манноповга тиббий хизмат кўрсатишда бир қатор лицензия талаб ва шартлари бузилганлигини асословчи ҳужжатларни судга тақдим этган.

Суд ушбу муҳокамада тақдим этилган, хусусан, иш юритишни тўхтатиш учун асос сифатида илтимосномага илова қилинган ҳужжатларни ўрганиш, шу билан бирга ишда ишда иштирок этувчи шахсларга ўз талаб ҳамда эътирозларини асословчи ҳужжатларни тақдим этишга имкон берган ҳолда муҳокамани бошқа муддатга қолдирган.

Зангиота туманлараро иқтисодий судининг 2023 йил 2 июндаги ҳал қилув қарорига кўра Соғлиқни сақлаш вазирлигининг “Omad plyus” масъулияти чекланган жамиятига нисбатан берилган лицензияни бекор қилиш тўғрисидаги аризаси қаноатлантирилиб, “Omad plyus” масъулияти чекланган жамиятига тиббий фаолиятни амалга ошириш учун берилган 2021 йил 16-февралдаги 27390032-рақамли лицензия бекор қилинган.

• Фарҳод Маннопов
• Mittivine