Суд залидан ИИБ биносига олиб кетилган шахс вафот этди. Бу ҳақда Тошкент вилояти ИИББ хабар берди.

Қайд этилишича, Бекобод шаҳар Жиноят ишлари бўйича судига ЖКнинг 104-моддаси 2-қисми “е, к, л” бандлари билан айбланувчи 33 ёшли фуқаро Х.Ю.га нисбатан тергов ҳаракатлари олиб борилиб, тўпланган ҳужжатлар мазмунан кўриб чиқишлик учун юборилган.

Жорий йилнинг 19 июнь куни Бекобод шаҳар суди томонидан мазкур жиноят ишини кўриш жараёнида, айбланувчи Х.Ю.нинг акалари укасига нисбатан озодликдан маҳрум қилиш жазоси тайинлангандан норози бўлиб, суд залида жанжал кўтаришгани оқибатида жамоат тартиби бузилиши юзага келган.

Жамоат тартибини тиклаш ва фуқаролар хавфсизлигини таъминлаш мақсадида суд залига ҳудудий ички ишлар бўлими ходимлари чақиртирилган.

Шунингдек, чақирувга асосан етиб келган уч нафар ИИБ профилактика инспекторлари томонидан жанжал бартараф қилиниб, ҳуқуқбузарлик ҳолати юзасидан ҳужжатларни расмийлаштириш мақсадида воқеа иштирокчилари шаҳар ИИБ биносига олиб борилган.

Шундан сўнг, ИИБ биносига кириш йўлагида, фуқаролардан бири соғлиги ёмонлашиб ҳушини йўқотган. ИИБ ходимлари фуқарони хизмат автомашинасида шаҳар шифохонасига олиб борган. Қайд этилишича, тиббиёт бирлашмаси ходимлари томонидан кўрикдан ўтказилган вақтида айбланувчи вафот этганлиги аниқланган.

Маълум қилинишича, ҳозирда ушбу фуқаронинг ўлими сабабларига аниқлик киритиш мақсадида суд-тиббий экспертизаси тайинланган. Шунингдек, ушбу ҳолат прокуратура органлари томонидан назоратга олиниб, суриштирув ишлари олиб борилмоқда.

• ИИБ
• Суд