Сурхондарёдан Тошкентга сотиш учун олиб келинаётган 140 кг истеъмолга яроқсиз гўшт тўхтатиб қолинди. Бу ҳақда Ички ишлар вазирлиги матбуот хизмати хабар берди.

Қайд этилишича, жорий йилнинг 28 июль куни соат 23-00ларда Дарбанд ЙПХ масканида “Шўрчи-Тошкент” йўналишида ҳаракатланиб кетаётган "Cobalt" автомашинаси юк хонаси текширилганида 100 кгдан зиёд номаълум ҳайвон гўшти олиб кетилаётганлиги аниқланган.

Ушбу гўшт маҳсулотини текшириб кўришлик учун Бойсун туман ветеринария лабораториясига тегишли ҳужжатлар расмийлаштирилиб топширилган. Текширув натижасига кўра, ушбу гўшт йирик шохли мол гўшти экани ва истеъмолга яроқсиз деб топилгани айтилган. Унинг соф вазни 140 кгни ташкил этган.

Хабарга кўра, маҳсулотни Тошкент шаҳрига сотиш учун олиб кетаётган шахсга нисбатан Ўзбекистон Республикаси Маъмурий жавобгарлик тўғрисидаги кодекснинг тегишли моддасига асосан маъмурий тартибда ҳужжатлар расмийлаштирилди.

• Гўшт
• Iste'molga yaroqsiz
• Сурхондарё
• Тошкент