Жанубий Корея полицияси Сеулдаги Президент маъмурияти мажмуасига рухсатсиз киришга уринган 20 нафар талабани ҳибсга олди. Бу ҳақда “The Korea Times” хабар берди.

Маълумотларга кўра, қўлга олинганлар Корея университетлари прогрессив иттифоқи аъзолари бўлган. Улар Ёнсан ҳудудидаги Президент Юн Сок Ёл мажмуасига дарвоза ва панжара орқали ошиб киришга ҳаракат қилган. Бунгача улар қимматли қоғозларни манипуляция қилишда гумон қилинаётган биринчи хоним Ким Кон Хига қарши норозилик акцияси ўтказиб, маъмуриятдаги масъул шахслар билан учрашишни талаб қилган.

Маълумот учун, асосан мухолифат назоратида бўлган Жанубий Корея парламенти амалдаги президентнинг рафиқаси устидан тергов ўтказиш бўйича қонун лойиҳасини қабул қилган бўлсада, Давлат раҳбари бунга вето қўйган эди.

Эслатиб ўтамиз, 2023 йилнинг ноябрь ойида Корея Республикаси Олий суди мамлакатнинг амалдаги Президенти Юн Сок Ёлнинг қайнонаси бўлган Чхве Ин Сунни ҳужжатларни қалбакилаштириш ва кўчмас мулкни рўйхатга олиш қонунчилигини бузганликда айбдор деб топиб, уни бир йил қамоқ жазосига ҳукм қилганди.

• Janubiy Koreya
• Президент