Бугун, 8 июнь куни Тайван Мудофаа вазирлиги Twitter саҳифасида Тайван ҳарбийлари ярим кун давомида оролга яқинлашиб келаётган Хитой Халқ Озодлик Армиясининг (ХХОА) 37 та самолётини пайқагани қайд этилди.

“Бугун, 8 июнь куни соат 5:00 дан (Тошкент вақти билан соат 02:00) 37 та ХХОА самолёти, жумладан J-11 ва J-16 қирувчи самолётлари, H-6 бомбардимончи самолёти, Y-20 танкери, шунингдек, жосус самолётлар Тайваннинг жануби-ғарбий ҳаво ҳудудига кириб келди”, – дейилади хабарда.

Маълум қилинишича, бир нечта самолёт Тинч океанининг ғарбий қисмига Тайван жануби-шарқий ҳаво ҳудуди орқали “узоқ масофали ҳаво разведка машғулотларини ўтказиш учун” кирган.

Бир неча соат аввал мудофаа департаменти 12 та самолёт ва тўртта кемани орол қуролли кучлари Тайван яқинида аниқлагани ҳақида хабар берди.

Тайван атрофидаги вазият ўтган йил август ойи бошида АҚШ Конгресси Вакиллар Палатасининг ўша пайтдаги спикери Ненси Пелосининг оролга ташрифидан сўнг сезиларли даражада кескинлашган. Оролни ўз вилоятларидан бири, деб билган Хитой бу ҳаракатда АҚШнинг Тайван сепаратизмини қўллаб-қувватлаётганини кўриб, Пелосининг ташрифини қоралади ва кенг кўламли ҳарбий машғулотлар ўтказди.

• Тайван
• Хитой