TikTok Буюк Британиянинг маълумотларни назорат қилувчи ташкилоти томонидан болалар шахсий ҳаётини ҳимоя қилмагани учун 12,7 миллион фунт стерлинг миқдорида жаримага тортилди.

Ҳисоб-китобларга кўра, TikTok 2020 йилда 13 ёшгача бўлган 1,4 миллионга яқин Британия болаларига платформадан фойдаланишга рухсат берган.

Ахборот комиссия бошқармаси (ICO) томонидан ўтказилган терговга кўра, ижтимоий тармоқ ушбу ёшдаги болаларнинг маълумотларидан ота-оналарнинг розилигисиз фойдаланган.

Қайд этилишича, TikTok ҳисоб қайдномасини яратиш учун минимал ёш сифатида 13 ёшни белгилаганига қарамай, бу ёшдаги кўпчилик болалар сайтга киришга муваффақ бўлишган.

Бу ҳолатда, болаларнинг маълумотлари уларни кузатиш ва профиллаш ҳамда уларга зарарли ёки номақбул контентни тақдим этиш учун ишлатилган бўлиши мумкин.

«Фарзандларимиз рақамли дунёда жисмоний дунёда бўлгани каби хавфсиз бўлишига ишонч ҳосил қилиш учун қонунлар мавжуд. TikTok бу қонунларга риоя қилмади», – дейди ахборот комиссари Жон Эдвардс.

Маълум қилинишича, TikTok жарима миқдори бўйича шикоят қилиш ҳуқуқига эга ва бу муваффақиятли бўлса, якуний жарима миқдори камайтирилиши мумкин.

• Буюк Британия
• TikTok