Президент томонидан "Тошкент халқаро молия маркази тўғрисида"ги Конституциявий қонун имзоланди.

Бу жорий йилнинг энг муҳим иқтисодий янгиликларидан бири ҳамда қарийб ўн йилдан буён амалга ошириб келинаётган тизимли ислоҳотларимизнинг мантиқий натижасидир,- дейди Ўзбекистон Республикаси Президенти Администрацияси раҳбари Саида Мирзиёева.

Ушбу ҳужжат мамлакатимизда халқаро стандартларга мос молиявий инфратузилмани шакллантириш, инвестиция муҳитини янада яхшилаш ва Ўзбекистоннинг халқаро капитал бозорларидаги рақобатбардошлигини оширишга қаратилган муҳим институционал ислоҳот ҳисобланади.

Тошкент халқаро молия маркази ҳудудида инвесторлар ва молиявий ташкилотлар учун алоҳида ҳуқуқий режим жорий этилади. Марказда мустақил молиявий регулятор, Тошкент халқаро тижорат суди ва низоларни ҳал этишнинг замонавий механизмлари фаолият юритади. Бу эса халқаро инвесторлар учун ҳуқуқий кафолатлар ва барқарор бизнес муҳитини таъминлашга хизмат қилади.

Янги марказ банк ва инвестиция хизматлари, капитал бозори, суғурта, ислом молияси, финтех, рақамли активлар, активларни бошқариш, юридик ва консалтинг хизматларини қамраб олган замонавий молиявий экотизим сифатида ривожлантирилади.

2030- йилгача мазкур ташаббус орқали 20–25 млрд АҚШ долларигача қўшимча инвестициялар жалб қилиш, иқтисодиётнинг йиллик ўсишига қўшимча ҳисса қўшиш, 15 минггача юқори малакали иш ўрни яратиш ва 10 минг нафар мутахассиснинг малакасини ошириш режалаштирилган.

Бу эса хусусий секторни ривожлантириш, инновацион молиявий хизматларни кенгайтириш ва мамлакатнинг инвестициявий жозибадорлигини янада оширишга хизмат қилади.

Тошкент халқаро молия марказининг ташкил этилиши – Ўзбекистоннинг очиқ, рақобатбардош ва халқаро молиявий тизимга чуқур интеграциялашган иқтисодиётни барпо этиш йўлидаги муҳим стратегик қадамидир.

• Молия
• Президент
• Президент Администрацияси
• Саида Мирзиёева