Жорий йилнинг баҳорида очиладиган Тошкентнинг биринчи Oxygen паркида 300 та дарахт экилди. Паркнинг асосий хусусиятларидан бири аттракционлар ва овқатланиш пунктларининг тўлиқ йўқлиги ҳисобланади. Ушбу парк шаҳар аҳолиси табиатдан баҳраманд бўлишлари учун тинч, яшил дам олиш масканига айланади.

Экология вазири Азиз Абдуҳакимов парк иқлимга мослашган маҳаллий ўсимликлардан фойдаланган ҳолда Европа ва Япония намуналарида яратилганини таъкидлади.

Бу ерда ноёб атиргул боғи, табиий кўл, қушлар учун уялар пайдо бўлади. Йўллар тош билан қопланган, ўриндиқлар эса қуритилган ёғочдан ясалган. Паркка кириш бепул бўлади ва ахлат қутилари ҳудуднинг тозалигини бузмаслик учун фақат кириш жойига ўрнатилади.

Oxygen паркда жами 1200 дан ортиқ дарахт ва 23 мингта бута экиш режалаштирилган. Ўсимликларни суғориш учун сунъий ҳовуз ва қуёш энергияси билан ишлайдиган ер ости қудуғи яратилади.

• Экология
• Ўзбекистон
• Тошкент