Айни вақтда ижтимоий тармоқларда иссиқ сув қувурида катта авария юз бергани, иссиқ сув фонтан бўлиб отилаётгани акс этган видео тарқалмоқда. Бу ҳақда Миробод тумани ҳокимлиги расмий муносабат билдирди.

Қайд этилишича, ҳозирда Тошкент шаҳрида иссиқлик тармоқларини гидравлик синовдан ўтказиш ишлари давом этмоқда.

Таъкидланишича, айни ҳолат гидравлик синов вақтида “Файзиобод” ГАИ ҳудудида рўй берган ва шу жойнинг ўзида барча чоралар кўрилган. Ҳодиса оқибатида ҳеч ким жабрланмаган.

Маълум қилинишича, 20 июндан 2 августгача Тошкент шаҳрида иссиқлик тармоқларининг гидравлик синовлари (механик куч ва зичлик учун юқори босим остида иссиқлик тармоқларининг синовлари) ўтказилади.

Синовлар давомида иссиқлик тармоқлари қувурларининг шикастланиши ва иссиқ сув йўллар ва йўлакларга чиқиши мумкин. Ҳайдовчилар, пиёдалар ҳамда маъмурий ва турар-жой биноларидаги юртдошларимиздан эътиборли бўлишларини сўралади.

Носозликлар аниқланган тақдирда (78) 129-01-85 телефон рақами орқали хабар берилиши мумкин.

Синовлар 2014 йил 18 декабрдаги “Иссиқлик тармоқлари ва иссиқлик пунктларидан техник фойдаланиш қоидалари” билан тартибга солинади.

• Тошкент
• иссиқ сув