Тошкент шаҳрида тақиқланган жойларда сигарет чекканларга жарима жазоси қўлланилаётгани айтилмоқда.

Ижтимоий тармоқларнинг бирида ёзилишича, кўчада сигарета чекканлик ҳолати бўйича 3 нафар фойдаланувчисига 90 минг сўмдан жарима қўллашган.

“Кўчада чекканлик учун 90 минг сўм жаримага тортишди. Гуруҳимизга ҳудди шундай 3 та ҳолат бўйича ёзишди. Улардан бири электрон сигарета учун”, – дейилади Телеграм каналларнинг бирида.

“Эрим ҳозир уйга келаётганида тамаки чеккани учун жаримага тортишибди. Жарима 90 минг сўм, телефонга СМС келди. Агарда тезда тўласак, 63 минг сўм экан. Ҳамма чекяпти-ку ёки мен нимадандир бехабарманми? Айнан қаерда чекиш керак?” – деб ёзади улардан бири.

Шунингдек, ижтимоий тармоқ фойдаланувчилари пойтахтда чекиш учун ажратилган махсус белгили жойлар деярли йўқлигини айтади.

Маълумот учун, Маъмурий жавобгарлик тўғрисидаги кодекснинг 56-1-моддасига кўра (иш жойларида, соғлиқни сақлаш, таълим, спорт-соғломлаштириш муассасаларида, ёнғин чиқиш хавфи бўлган жойларда, шу жумладан, автомобилларга ёнилғи қуйиш шохобчаларида ва бошқа жамоат жойларида тамаки маҳсулотини истеъмол қилиш, бундан тамаки маҳсулотини истеъмол қилиш учун махсус ажратилган жойлар ва (ёки) хоналар мустасно) базавий ҳисоблаш миқдорининг учдан бир қисми миқдорида жарима (90 минг сўм) солишга сабаб бўлади.

• Жарима
• МЖтК
• Сигарета