Кеча, 10 июнь куни Тошкент шаҳар Учтепа туманидаги 62-сонли мактабнинг информатика фани ўқитувчиси мактаб ўқувчиси ва унинг оила аъзолари томонидан калтаклангани ҳақида хабар берилган эди.

Ҳолат бўйича Ўзбекистон Республикаси Президенти Администрацияси раҳбарининг ўринбосари Комил Алламжонов муносабат билдирди.

“Тошкент шаҳар Учтепа туманидаги 62-сонли мактабнинг информатика фани ўқитувчисини калтаклашда иштирок этган кимки бўлса, уларнинг барчаси қонунда белгиланган тартибда қаттиқ жазоланади. Бу бўйича ҳуқуқ-тартибот органларига керакли кўрсатмалар берилди. Валломати бўлса ҳам, ўқитувчини хафа қилишга ҳеч кимнинг ҳаққи йўқ”, – деб ёзди Комил Алламжонов.

Шунингдек, Мактабгача ва мактаб таълими вазири Ҳилола Умарова мазкур ҳолатни шахсан ўзи назоратга олганини таъкидлади.

Ҳолат бўйича шаҳар ИИББ қўшимча маълумот эълон қилди.

Ўзаро келишмовчилик сабабли келиб чиққан можаро натижасида ўқитувчи тан жароҳати олганлиги ҳолати юзасидан Жиноят кодексининг 277-моддаси («Безорилик») билан жиноят иши қўзғатилган.

“Жиноят иши Тошкент шаҳар ИИББ раҳбарияти томонидан назоратга олинган. Тергов якуни бўйича қонуний қарор қабул қилиниши ва айбдор шахсга нисбатан қатъий чора кўрилиши таъминланади”, – дейилади хабарда.

• Kaltaklash
• Комил Алламжонов
• Maktabgacha va maktab ta'limi vazirligi
• Президент Администрацияси