2025 йил 15 октябрь куни Azon Global таҳририяти медиа платформанинг фаолияти тўхтатилишини маълум қилди. Расмий баёнот лойиҳа сайтида эълон қилинди. Унда жамоа бу қарорни қонунга ҳурмат ва жамият олдидаги масъулиятни ҳис этиб қабул қилганини таъкидлади.

“Биз — Azon Global жамоаси, қонунга ҳурмат ва итоат юзасидан барча медиа фаолиятимизни тўхтатишга қарор қилдик. Бу оғир, аммо виждон, устозимизга бўлган ҳурмат ва жамиятга садоқат асосида қабул қилинган қарор”, — дейилади баёнотда.

Таҳририят маълумотга кўра, лойиҳа фаолияти суд ҳукми билан блокланганидан кейин қонун талабларига мувофиқ равишда тўхтатилган. Жамоа бу вазиятни тинчлик ва сабр билан қабул қилганини қайд этди.

Эслатиб ўтамиз, 8 октябрь куни жиноят ишлари бўйича Тошкент шаҳар Учтепа тумани судида Azon Global лойиҳаси асосчиси Мубашшир Аҳмад (Алишер Турсунов) иши бўйича суд жараёни якунланган эди. Суд ҳукмига кўра, у 2 йил 6 ой муддатга озодликдан маҳрум қилинганди.

• Лойиҳа
• Суд
• тақиқ